Grenell mbështet gjashtë deputetët e LDK-së: Hoti dhe kolegët e tij janë miq të Amerikës
Richard Grenell shprehu në llogarinë personale mbështetje për Avdullah Hotin dhe kolegët e tij; qëndrimi nuk është deklaratë zyrtare e Qeverisë amerikane.
Richard Grenell ka dalë në mbështetje të gjashtë deputetëve të LDK-së që kanë deklaruar se nuk do ta votojnë Bekim Sejdiun për president të Kosovës.
Në një postim në platformën X, Grenell veçoi Avdullah Hotin dhe e cilësoi atë mik të tij, ndërsa për kolegët e Hotit tha se janë miq të shkëlqyer të Amerikës.
“Miku im Avdullah Hoti dhe kolegët e tij janë miq të shkëlqyer të Amerikës”, shkroi Grenell në llogarinë e tij.
Reagimi erdhi pasi gjashtë deputetë të LDK-së kundërshtuan kandidaturën e Bekim Sejdiut, të dalë nga marrëveshja politike ndërmjet kryetarit të LVV-së, Albin Kurti, dhe kryetarit të LDK-së, Lumir Abdixhiku.
Qëndrimi i Grenellit është shprehur në llogarinë e tij personale dhe i shtohet debatit politik për votat e nevojshme në Kuvend për zgjedhjen e presidentit.