Ermal Sadiku paraqet gjashtë prioritete për LDK-në: Demokracia e brendshme duhet ruajtur

Deputeti i LDK-së, Ermal Sadiku, ka paraqitur gjashtë pika që, sipas tij, duhet ta udhëheqin zhvillimin e ardhshëm të partisë.

Sadiku kërkoi që LDK-ja të çlirohet nga komplekset ndaj së kaluarës dhe të mbrojë rolin e saj në shtetformimin, shpalljen e pavarësisë dhe ndërtimin e institucioneve të Kosovës.

Ai tha se partia duhet të ketë qëndrim të qartë për luftën, Ushtrinë Çlirimtare të Kosovës dhe forcimin e kapaciteteve mbrojtëse, ndërsa teknologjinë, inovacionin dhe zhvillimin ekonomik i renditi mes prioriteteve kombëtare.

Në propozimet e tij përfshihen gjithashtu një angazhim më i madh për të rinjtë dhe ndërtimi i identitetit të LDK-së rreth një kauze të vetën, pa u përcaktuar nga qëndrimet e partive të tjera apo nga koalicionet e mundshme.

Sadiku vuri theks të veçantë te demokracia e brendshme, duke argumentuar se mendimi ndryshe, debati dhe e drejta për ta kundërshtuar kryetarin duhet të ruhen edhe kur mund të kenë kosto elektorale.