Arrestohet një person i dyshuar se kanosi Albin Kurtin dhe zyrtarët policorë

Policia e Kosovës ka arrestuar në Prishtinë një person të dyshuar se përmes rrjeteve sociale kanosi kryeministrin në detyrë, Albin Kurti, dhe më pas edhe zyrtarët policorë.

Sipas raportit 24-orësh të Policisë, njësitet vepruan në koordinim me Prokurorinë Speciale, pasi identifikuan të dyshuarin dhe lokalizuan vendndodhjen e tij. Policia pretendon se ai i kanosi zyrtarët policorë para arrestimit.

Pas intervistimit, me vendim të prokurorit, i dyshuari është dërguar në mbajtje për 48 orë. Rasti është iniciuar për kanosje dhe dhunë ndaj përfaqësuesve të lartë të Republikës së Kosovës, ndërsa hetimet po vazhdojnë.

Të dhënat e publikuara janë pretendime të organeve të ndjekjes. I dyshuari konsiderohet i pafajshëm derisa përgjegjësia e tij të vërtetohet me vendim të formës së prerë të gjykatës.