AKK kritikon MASHTI-n: Nxënës pa tekste dhe shkolla pa dokumentacion në fillim të mësimit
AKK kërkon ndërhyrje urgjente nga MASHTI për mungesën e teksteve dhe dokumentacionit në shkolla.
Asociacioni i Komunave të Kosovës ka kërkuar ndërhyrje urgjente nga Ministria e Arsimit, pasi viti i ri shkollor ka nisur me mungesë tekstesh dhe dokumentacioni në një numër shkollash.
Drejtori ekzekutiv i AKK-së, Sazan Ibrahimi, tha se informacionet e mbledhura nga drejtoritë komunale të arsimit tregojnë se disa shkolla nuk e kanë dokumentacionin e nevojshëm shkollor dhe kurrikular.
Sipas tij, shumë nxënës e kanë nisur mësimin pa tekste, ndërsa prindër të ndryshëm kanë raportuar se ende nuk u janë transferuar mjetet për blerjen e librave.
Ibrahimi vlerësoi se këto obligime duhej të përfundonin para fillimit të vitit shkollor dhe kërkoi që pasojat e vonesave në nivel qendror të mos u bartën komunave, shkollave, mësimdhënësve dhe prindërve.
AKK-ja kërkoi që nxënësit të pajisen sa më shpejt me libra dhe që shkollave t’u sigurohet dokumentacioni i domosdoshëm për zhvillimin normal të procesit mësimor.